Gardaberak etengabeko jarraikortasuna duen prozesutzat jotzen du hezkuntza. Gure ustez, hezkuntza ez da haurtzaroari soilik dagokion zerbait, bizitza osoan zehar ikasten aritzen baikara. Hezkuntza Sortzailean oinarritzen gara. Teoria eta praktika pedagogiko honek ikaskuntzaren eta garapenaren prozesu indibidualak bultzatu nahi ditu. Ildo honetatik, hezkuntza-prozesuan eskaerak azaldu eta une horretan bertan heldu behar zaizkiolakoan gaude, inola ere denboran aurreratu barik edo aldez aurreko eredurik ezarri gabe. Lagundu bai, baina bidea finkatu edo markatu gabe. Horrela, ikerketa eta araketa izango dira ezagutzarako bitartekoak, eta barne-barneko motibazioari erantzuna emango zaio eta, aldi berean, gizakiaren berezko jakin-mina ere ase egingo da. Azken batean, edozein gizabanakoren bizitzan berez agertzen den ezaugarri bat -eskolaren eta haurtzaroaren eremuak gaindituta ere azaltzen dena- ez da kanpoaldetik zertan suspertu.